Soqqusaappat, sussappat?

Piviusoq malillugu illoq qaqugumorsuaq atasinnaavoq, kisiannili aatsaat taamaattoqarsinnaavoq aserfallatsaaliuineq eqqortoq ingerlanneqarsimappat.

Nalinginnaasumik aserfallatsaaliuineq suliariniarneqartillugu Nunatta Katersugaasivianut Allagaateqarfianullu akuersissummik qinnuteqartoqarneq ajorpoq. Tassanilu pineqarput qalipaanerit, saava, atortut, angissusaa ilusaalu allanngornagu suliarineqarneri. Taamaattumik nammineerluni pisortat saaffigeqqaanngikkuarlugit illoq qalipanneqarsinnaavoq, qupinerit aaqqissuunneqarsinnaapput, igalaat saavi qalipanneqarsinnaapput, illup qaliata atortua ataaseq aserornikoq suliarineqarsinnaapput. Taamaallaat eqqaamaniaannarneqassaat suliarineqaqqaarmat atorneqarsimasut, qalipaatit marraallu atorneqarsimasut atornissaat.

Illup eqqissisimasuutitap aserfallatsaaliornissaa nammineq suliarineqarsinnaanissaa ajunngilaq, eqqaamaniaannassaaq illup suliarineqarsimaneratut suliarineqaqqinnissaa. Atortummi sanariaatsillu piffissamut aaliangersimasumut ilisarnaataapput, taakkualu illulioriaatsip kulturianut eqqissisimasussaatitsinermullu pingaartorujussuupput. Illup suliarineqarniarnerani suliarineqaqqaarmalli sanariaasiusimasoq assigisariaqarpaa. Aserfallatsaaliuinissamut suliarineqartussat piginnittumit suliarineqarsinnaakutsoorput, kisiannilu arlaatigut nangaassuteqaraanni nalunnginnittumiit siunnersorneqarnissat pitsaanerpaassaaq.

Nunatta Katersugaasiviani Allagaateqarfianilu sulisut illunik nlaunnginnittut saaffigineqarsinnaapput, imaluunniit illunik titartaasartoq illuliorariaatsip oqaluttuarisaaneranut nalunnginnittoq.

Oqaaseq aserfallatsaaliuineq illunik eqqissisimasussaatitsinermi inatsimmi allaqqasoq nalinginnaasumik atorneqartariaasianinngaanniit allaaneruvoq. Taamaattumik sulisut, piginnittut, sanasullu amerlasuut aserfallatsaaliuinertut isigisaat ilaanneeriarluni Nunatta Katersugaasivianut Allagaateqarfianullu akuersissummik qinnuteqaqqaartoqarsimaneratigut aatsaat suliarineqarsinnaasarput. Arlaatigut nangaassuteqaraannit ilumut nalinginnaasumik aserfallatsaaliuinermut taakku suliassaanersut, taava Nunatta Katersugaasivianut Allagaateqarfianullu paasiniaasoqaqqaartariaqarpoq.