Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Illunik eqqissisimasussanngortitsisarneq

Illulioriaatsit kulturikkut kingornissatsinni takussutissani annerpaartaat ilaanniippoq. Taakkua ullutsinni takussaanerpaapput ingerlaarfiunerpaallutillu. Illut piffissat ingerlanerani Kalaallit kulturiannik illulioriaasianillu oqaluttuartuupput.

Illut eqqissisimasussanngortinneqarnikut oqaluttuassartatsinnut inuit oqaluttuassartaannut kinaassusaannullu pingaaruteqartorujussuupput. Eqqissisimasussanngortitsisarnermullu inatsisip illut nalillit illersorpai paariinnarumallugillu uagut kinguaassattalumi nuannaarutissaattut.

Illut 158-it eqqissisimasuutitat

Illut eqqissisimasuutitat nalunaarsukkat 158-iupput nuna tamakkerlugu. Annertunerpaartaallu nalinginnaasumik ineqarfiullutik, kisiannili sumiiffippassuaqarpoq Kalaallit Nunaata kulturikkut kingornussaannik takornariarniaraanni misissorneqarsinnaasut. Eqqissisimasussaatitammi illut amerlasuut kikkunnilluunniit alakkarneqarsinnaapput. Taakkua illuaraasinnaapput Kalaallit Nunaata Kangiata Avannaaniittut stationiusinnaapput imaluunniit illoqarfinni nunaqarfinniluunniit nuna tamakkerlugu illut alakkarneqarsinnaasut.

Illut eqqissisimasuussaatitat tamarmik allattorsimaffiat

Nunatta Katersugaasivia Allagaateqarfialu pisussaatitaapput illunik eqqissisimasuutitat ataannartinniakkallu allattorsimaffiannik ingerlatsitsissalluni, tassanilu takuneqarsinnaassapput Kalaallit Nunaat tamakkerlugu illut suut eqqissisimatitaanersut.

Maanna illut eqqissisimasuutitat tassaapput quersuarniit illuaqqanut aammalu Kalaallit Nunaata Kangiata Avannaaniittut stationit. Ullumikkut illut eqqissisimasuutitat katillugit 158-iupput taakkualu nuna tamakkerlugu nassaassaapput, taakkunanngaanniit 93-it illoqarfiit nunaqarfiillu akornanniipput, 55-it kulturikkut eriagisassatut eqqissisimasuutitat Igalikumiipput, illuaqqat stationillu qulit Kalaallit Nunaata Kangiata Avannaaniipput. Illut eqqissisimasuutitat Kalaallit Nunaanni inuiattut ineriartornermut takussutissaapput imaluunniit ilisimasassarsiorluni angalanermut piniariartarnermullu takussutissaallutik.

Maanna Nunatta Katersugaasiviata Allagaateqarfiatalu nutaanik eqqissisimasussanngortitsisarnerit isumagisarpai, aammattaat Nunatta Katersugaasiviata Allagaateqarfiatalu akuersisartuupput arlaatigut eqqissisimatitat allanngortinneqassappata piffiit illullu eqqissisimasuutitat nalaanni nalinginnaasumik aserfallatsaaliuinerup saniatigut allannguisoqassappat.

Quppernerni ukunani tulliuttuni atuarsinnaavatit Nunatta Katersugaasiviata Allagaateqarfiatalu ingerlatai, ukunanilu quppernerni paasisaqarnerusinnaavutit illunut eqqissisimasuutitanut tunngasunut apeqqutissaqaruit, imaluunniit eqqissisimasuutitamik illoqaruit.

Saamiatungaanilu isiginnaagassiaaqqat illunik eqqissisimatitanik sammisaqartut isiginnaarsinnaavatit.
Siullertut takuniarneqarsinnaavoq katersugaasivilerisoq Inge Bisgaard, aallakaatitassiami Illermi (KNR) pulaartutut peqataanera. Illutoqqat kulturikkut kingornussat kinaasusitsinnut oqaluttuaqataanerat pillugu qaammarsarneqarput.

Aappaattut Realdania By og Bygip illut Ilimanamiitut oqaluttuarisaanermut attuumassutillik nutarsarneqarnerat isinnaarneqarsinnaavoq. Isiginnaagassiaq Ánorâk Filminiit pilersinneqartoq.

CloseClose

Ujarfigiuk Nunatta Katersugaasivia Allagaateqarfialu