NKA’p eqqissisimasussanngortitseriaasia
Illut eqqissisimasussaatitat ilui silataalu tamarmik eqqissisimasuutitaapput. Illut eqqissisimasussaatitaasarput arlaatigut kulturikkut oqaluttuassartakkut pingaaruteqarpata, imak paasillugu Kalaallit Kulturiannut pingaaruteqartorujussuit kinguaatta misigisariaqagaannik.
Uani quppernerni Nunatta Katersugaasiviata Allagaateqarfiatalu qanoq, - soorlu eqqissisimasussanngortitseriaaseqarnersut paasiniaaffigisinnaavat. Illunik eqqissisimasussanngortitsiniaraanni suut piumasaqaataappat, qanorlu ingerlariaaseqarpat. Allattorsimaffimmi Illut eqqissisimasuutitat tammatsaalisallu misissorsinnaavatit illut suut maannamut eqqissisimasussaatitaanersut.
Sooruna eqqissisimasussanngortitsisartugut?
Kalaallit Nunaanni 158-inik illoqarpoq eqqissisimatitanik. Nunatta Katersugaasiviata Allagaateqarfiatalu eqqissisimasussanngortitsisarneq isumagisarpaa. Kalaallit kulturikkut kingornussaat nunarsuup inuillu oqaluttuarisaanerannut pingaartorujussuupput, Kalaallit Nunaannilu eqqissisimasussanngortitsisarnerup nunarsuarmi kulturikkut kingornussassaqarnissamut illersueqataapput.
Inatsisartut inatsisaat nr. 11, 19.maj 2010-meersup illut eqqissisimasussaatitat inunnit aserorterneqannginnissaat anguniarlugu illersuipput. Inatsisip siunertarivaa nunami illut illulioriaatsimut, kulturikkut oqaluttuassamut imaluunniit avatangiisinut arlaatigut nalillit illersorneqarnissaat. Illut kalaallit oqaluttuassartaannut piffissallu ingerlanerani illuliortariaasiannut paasissutissiisuupput, Inatsisartullu inatsisaat tassaavoq inuiaqatigiittut kulturikkut eriagisassanut tunngasunut akisussaaffimmik tigusineq, taakkualu ilisimatusarnissamut paasissutissiisuupput, ullutsinnut siunissamullu tunngaviusumik misigititsinissamut, imminut paasinninnissamut, atugassarititaasunut suliffeqarfinnullu tunngasunik paasissutissiissapput.
Eqqissisimassaatitsineq nalinginnaasumik killeqanngitsumik atuuppoq, taamaattumillu illunik aserfallatsaaliuineq tammatsaaliuinissamut aqqutaavoq. llumik eqqissisimasussanngortitsisoqartillugu taarsiisoqarneq ajorpoq. Taamaattumik illumik piginnittoq illoq eqqissisimasussanngortinneqarpat aserfallatsaaliuinissaanut pisussanngortinneqartarpoq. Tamanna imak isumaqarpoq illup aserfallatsaaliorneqarnissaanut illup qalia, iikkat silarliit, matut igalaallu ussiitsuunnginnissai isumannaarneqassasut. Atortussallu suunerinik uani atuaqqissinnaavutit, taannalu akuerineqarnissamut qinnuteqaateqartoqarnerani ilanngunneqassaaq, taassumalu illup eqqissisimasuutinneqarnerata nalingata atatiinnarneqarnissaanut isumannaarinnittuusussaavoq.
Katersugaasiviunngitsoq, kisianni ...
Illoq eqqissisimasussanngortinneqarsimatillugu allannguisoqarniaraangat akuersissummik Nunatta Katersugaasivianut Allagaateqarfianullu qinnuteqartoqaqqaartariaqarpoq tassanilu pineqarput allannguinerit aserfallatsaaliuinerup saniatigut suliarineqarumasut.
Illoq eqqissisimasussaatitaq katersugaasiviunngilaq, kisiannili allannguisoqarniartillugu illup pitsaassusaa immikkuullarissusaatalu ataavartinnissai ineriartortinnissaalu pingaaruteqarpoq. Tassanilu eqqartorneqarput illup eqqissisimasussanngortinneqarneranut peqqutaanikut. Allannguut qanorluunniit mikitigigaluarpat angitigigaluarpalluunniit Nunatta Katersugaasivianit Allagaateqarfianiillu akuerineqaqqaartariaqarput. Qaliata suliarinissaanut, iikkamik nuutsitsinissamut, matumik ikkussinissamut, illup saavatigut allagartaliinissamut assigisaanillu suliaqarniaraanni akuersissummik qinnuteqartoqaqqaartariaqarpoq. Inatsisartut Inatsisaat nr. 11, 19. Maj 2010-meersumi imm. 3 §22, stk.1 aamma 2-mi allannguineq pillugu atuaqqissinnaavutit.
Akuersissummik qinnuteqaqqaartoqartariaqarneranut peqqutaavoq illup eqqissisimasunngortinneqarsimaneranut peqqutaasut attatiinnarneqarnissaat naleqarnerulersinneqarnissaanulluunniit isumannaarinninniarneq. Illummi allanngortinneqarnerani atortussat sanariaaserluunniit kukkusoq atorneqarsimappat imaaassinnaagami illup immikkuullarinnera nalialu annaaneqartut, taakkualu immaqa eqqissisimasussanngortitsinermut aallaaviusimagaluartut.
Aaliangersimasuni iluarsaanerni taarsiisoqarniartillugu atortut sanariaaserlu illu sananeqaqqaarmat atorneqarsimasut illu taamanikkutut isikkoqaannarnissaanut aaliangiisuussappata atorneqassapput. Illullu eqqissisimasussaatitat iluarsaanneqassappata inuit sulianut taakkununnga pisinnaasut suliarinnittuussapput, pingaartorujussuuvorlu illup suliarineqarsimanera malinnaavigineqarnissaa. Malinnaaniarnermut peqqutaavoq illup qanoq sananeqarsimanera piffissallu ingerlanerani qanoq isikkoqarsimanera paasiniaaffigineqarniassammat. Illu iluarsaanneqassappat illutoqqap oqaluttuassartaa tunngaviusumik ataqqineqassaaq.