Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Allagaateqarfik atoruk

Nunatta Allagaateqarfia Kalaallit Nunaata oqaluttuassartaa pillugu, siuaasanik paasiniaanermut, opgaveliornermut assigisaannullu atorneqarsinnaavoq.


Allagaateqarfimmut saaffiginninnerit oqarasuaatikkut imaluunniit e-mailikkut ulluinnarni pissapput. E-mailikkut apeqquteqaatit ullut 2-3 qaangiuttinnagit akineqassapput. Apeqquteqaatit allagaatinut tunngasut annerusumik misissortariallit akeqartinneqarput. Tamanna pillugu paasisaqarnerorusukkuit allagaateqarfik saaffigiuk.

 

Siuaasanik paasiniaaneq

Siuaasanik paasiniaanermi nalinginnaasumik atorneqarnerpaat tassaapput atuagarsuit (kirkebøger). Taakkua toqqaannarlugit internettikkut takuneqarsinnaapput imaluunniit allagaateqarfimmi misissuinissamut inniminniinermi.

 

Ilisimatusarneq

Atuagarsuit saniatigut allagaaterpassuit allat takuneqarsinnaapput. Ilisimatusarnermut atatillugu allagaatinik aalajangersimasunik assigisaanillu atorfissaqartitsiguit allagaatilerisut saaffigikkit, taakkumi periarfissanik assigiinngitsunik siunersussavaatsit.


Malugineqassaaq allagaatit ilaat takunnissinnaanermut killeqartitaasarmata. Pisortat allagaataannut tunngatillugu nalinginnaasumik ukiut 25-t qaangiutereernerisigut inuinnarnit aatsaat takuneqarsinnaapput imaluunniit inummut paasissutissat mianernartuuppata ukiut 80-iupput. Taamatuttaaq inuinnarnit allagaatit aammalu peqatigiiffinnit tunniussat, kisiannili matumani allagaatinik takunnissinnaanermut killigititaq tunniussisup allagaateqarfiullu akunnerminni immikkut isumaqatigiissutigisinnaavaat. Kiisalu allagaatit ilaat qajannarsisimappata mianersuuttariaqalersimallutillu atorneqarsinnaanngillat.


Allagaatinik tamanut ammasuunngitsunik takusaqarusukkaanni, allagaatip takunissaanut immikkut ittumik allagaateqarfimmut qinnuteqartoqarsinnaavoq. Qinnuteqaat allakkatiguussaaq, tassanilu allaqqassapput allagaatit suut takorusunneqarnersut, suna siunertaralugu takuniarneqarnersut, kinalu nassiussisuunersoq saaffiginniffissallu.

 

Allagaatit qanoq pineqarnissaat assiliisinnaatitaanerlu

Allagaatit tamarmik mianersortumik passunneqassapput. Aaqqateqarnissaq pisariaqanngilaq, kisianni assaat ipeqassanngillat allagaatillu passutilinnginneranni creme tarngut atorneqarnaveersaassaaq. Allagaatit atukkat assiliivimmik assilineqarsinnaapput. Taamaattorli allagaatit piginnittussaatitaanermik inatsip ataaniittut assilineqaqqusaanngillat. Pineqartut manuskriptiusinnaapput assigisaallu. Sulisulli allagaatit saqqumminnginnerini tamanna siumut ilisimatitsissutigeriissavaat.

 

Inuit namminneq allagaataannik tunniussineq

Inuit ataasiakkaat, peqatigiiffiit suliffeqarfiillu Nunatsinnut attuumassutillit periarfissarivaat allagaatiminnik allagaateqarfimmut tunniussisinnaaneq, apeqqutissaqaruillu Nunatta Allagaateqarfia saaffigisinnaavat.

 

Pisortanik sullissineq

Kalaallit Nunaanni pisortat suliffeqarfiutaasa allakkanik toqqortaataat, toqqortaasalu qanoq piffissap ingerlanerani pineqarnissaat, allagaateqarnermullu apeqqutit allat pillugit, allagaateqarfik siunnersuisarpoq. Nunatta Allagaateqarfiata sulinera allagaateqarnermut inatsitsimmi maleruagassanilu atuuttuni aallaavigalugit sulisarpoq.

CloseClose

Ujarfigiuk Nunatta Katersugaasivia Allagaateqarfialu