Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Illut eqqissisimasuutitaq

Kalaallit Nunaanni illut eqqissisimasuutitat 158-iusuni amerlanerpaartaat pisortanit pigineqarput. Illuni eqqissisimasuutitani piginnittut atuisullu pingaaruteqartorujussuupput, taakkuami kulturikkut kingornussatta aserfallatsaaliorneqarnissaannut illersornissaannullu isumannaarinnittussaapput.

Illoq eqqissisimasuutitaatillugu piginnittup illup paarilluarnissaa akissussaaffigisarpaa, silataatigut iluatigulluunniit aserfallatsaaliuinerminngaanniit annertunerusumik suliaqarniartoqartillugu piginnittoq Nunatta Katersugaasivianut Allagaateqarfianullu akuersissummik qinnuteqaqqaartariaqarpoq. 

 

Illumik eqqissisimasussaatitamik piginnittut

Illumi eqqissisimasuutitami najugaqarneq amerlasuuninngaannnit immikkut pisinnaatitaanertut isigineqartarpoq. Illummi eqqissisimasuutitat immikkuullarissuseqarput, tassa tarneqarlutillu oqaluttuassartaqarput, taamaasilluni illumi tassani najugaqarnissaq soqutiginarsisarluni. Piginnittullu aamma kulturikkut kingornussamut ingerlatsisuupput. Eqqissisimasussaatitsisarnerup siunertarivaa illup pitsaassusaata illersorneqarnissaa, taamaasilluni piffissami tulliuttumi Kalaallit Nunaata kulturikkut eriagisassaattut takussutissaassalluni.

Taamaattumik piginnittut pisussaatitaasarput illut paarilluarneqarnissaannut, aammattaarlu illu allanngortitserneqassappat tamanna Nunatta Katersugaasivianut Allagaateqarfianullu akuerineqaqqaartariaqarpoq, allannguutit illup silataanut iluanullu tunngasut tassani pineqarput. Nunatta Katersugaasivia Allagaateqarfialu allannguisoqarniartillugu siunnersuisarpoq ilitsersuisarlunilu. Taamaaliornikkullu piginnittut atortussanut sanariaatsinullu nalunnginnittunit siunnersorneqartarput.

 

Allannguiniarnerit akuerineqaqqaartariaqarput

Allanngiunerit annikitsut annertuullu suliariniaraanni Nunatta Katersugaasivianut Allagaateqarfianullu akuersissummik qinnuteqaqqaartoqartarpoq. Tassanilu qaliamik taarsersuinerit, illup iluani iikkanik nuutsitsinerit illup saavanut allagartaliinerit tamarmik ilaapput.

Nalinginnaasumik aserfallatsaaliuinermi atortut, sanariaaseq qalipaatillu atorneqarnikut atorneqassapput, taakkualu illup eqqissisimasuutitap eqqissisimasussanngortinneqarneraniit qanoq issusaata allanngortinneqannginnissaa anguniarlugu taamaasiortarput. Nunatta Katersugaasivia Allagaateqarfialu pisuni immikkuullarissuni akuerseriasaarsinnaavoq atortut, sanariaatsit qalipaatillu allat atorneqarsinnaanissaannut. Illunut eqqissisimasussaatitanut aserfatsaaliuinissaq nalinginnaasoq pillugu "Soqqusaappat, sussappat?"-mi atuaqqissinnaavutit

Illumik eqqissisimasuutitamik suliaqarniartut tamarmik akuersissummik qinnuteqaqqaarnissaanut peqqutaavoq illup eqqissisimasuutitap suliarineqarnermini eqqissisimasussanngortinneqarnermini isikkuni nalinilu annaannginnissaa. Allannguisoqarpat atortussat imaluunniit sanariaaseq kukkusoq atorlugu, imaassinnaavoq illup eqqissisimasussanngortinneqarnermini nalini immikkuullarissutsinilu annaagaa.

 

 

Uani ikiortissinnaavutit

Nunatta Katersugaasivia Allagaateqarfialu illunut eqqissisimasussaatitanut oqartussaannaanani aamma piginnitunut siunnersuisinnaapput. Eqqissisimasussaatitsinermut imaluunniit arlaatigut illumi suliaqarniarninnut apeqqutissaqaruit saaffigisinnaavatsigut. Aamma uani paasissutissanik siunnersuutissanillu atuarsinnaavutit.

 

Katersugaasiviunngilaq

Illoq eqqissisimasussaatitaq katersugaasiviunngilaq, kisiannili atorneqarnissaa pingaaruteqarpoq. Illumummi pitsaanerpaavoq atorluarneqarnissaq. Immaqa angerlarsimaffittut, sannavittut pisiniarfittulluunniit. Isumassarsiorfissaq-mi siunnersuutinik allanik aamma misissuisinnaavutit illup eqqissisimasuutitap sumut atorneqarsinnaaneranut.

Kisiannili illup eqqissisimasuutitap atorneqarnerani illup eqqissisimasussaatitaassusaa innarlerneqassanngilaq. Pingaaruteqartorujussuuvormi allannguisoqartillugu illup pitsaassutsini immikkuullarissutsinilu attatiinnassagai. Nunatta Katersugaasivia Allagaateqarfia illumillu eqqissisimasussaatitamik piginnittut illup kulturikkut illuliortariaatsillu immikkuullarissusaannik takussutissartaasa paarineqarnissaannut ingerlatsisuupput.

Siunnersuineq ilitsersuinerullu eqqortup illup nalia allanngortinngikkaluarlugu suliarineqarnissaa piviusunngortissinnaasarpaa.

 

CloseClose

Ujarfigiuk Nunatta Katersugaasivia Allagaateqarfialu