Atortussanuk toqqorsiviliorneq

Illoqarfinni nunaqarfinnilu amerlasuuni illoqarpoq nakkaatiliivissunik, taakkunanilu atortut atorneqaqqissinnaapput. Isumassarsiatsialaavoq atortui siunissami atoqqitassatut toqqorneqarnissaat.

Siunissami illoqarfinni nunaqarfinnilu atortunut atornikunut toqqorsiviliortoqartariaqaraluarpoq, illunillu nutaanngitsunik aserfallatsaaliuisoqarniartoqartillugu aaqqissuisoqarniartoqartillugulu toqqorsivinnut aallertoqartarsinnaagaluarpoq/pisiniartoqartarsinnaagaluarpoq.

Toqqorsiviit illoqarfiup katersugaasiviata eqqaanut, imaluunniit katersugaasiviup illuutaannut inissisimasinnaagaluarpoq, imaluunniit kommunip sannaviiniissinnaagaluarput.

Ileqqoq malillugu

Qanga takornartaanngilaq illumik piffimmut allamut illoqarfimmulluunniit aallamut nuussineq. Illormi naleqarpoq isikkumigut atortutigullu, taakkualu ullutsinni pissarsiassaanngillat, oqaluttuarisaanermilu illulioriaatsimilu originaliullutik. Illup suliarinissaanut atortussat amerlanerpaatai normulersorneqarsimapput, Norgemiit Danmarkimiilluunniit nassiunneqannginnerini sananeqaqqaarsimapput atortussallu romamiut kisitsisaannik nalunaarsoriarlugit isaterneqaqqissimallutik taamaasioreernikkullu Kalaallit Nunaaannut aatsaat illussat nassiunneqarsimallutik. Sukani imaluunniit qaliami quassuttuuni kisitsisit allattorneqarnikut isigilluaraanni suli takuneqarsinnaasarput, ingammik qaliarpaaniittut.

Illoqarfippassuarni nunaqarfippassuarnilu illoqarpoq nutaanngitsunik ullumikkut atorneqarunnaarnikunik. Taakkua piffinnut allanut nuussorneqarsinnaagaluarpoq sananeqaqqillutillu, taamaasillunilu piffimmut qaangiuttumut aliannaartoqarsinnaagaluarluni, imaluunniit sianigalugit illut isaterneqarsinnaagaluarput atortullu illunik allanik kulturikkut oqaluttuarisaanermullu pingaarutilinnik aaqqissuussisoqarniartillugu atorneqaqqissinnaagaluarlutik.