Qanoq eqqissisimasussanngortitsisarpugut?
Nunatta Katersugaasivia Allagaateqarfialu ataavartumik saaffiginnissutinik eqqissisimasussanngortitsisoqarnissaanut tunngasunik pisarpoq, NKA'lu illunik kulturikkut oqaluttuarisaanikkullu pingaaruteqarsinnaasutut naliliisimagunik illunik eqqisisimasussanngortitsisarput. Kikkulluunniit eqqissisimasussanngortitsinissamik isumassarsiaqarunik NKA saaffigisinnaavaat. Taamaaliortoqassappallu piumasaqaataavoq illumut avatangiiserineqartunullu tunngasunik allakkanik paasissutissanillu eqqissisimasussanngortitsisoqarnissamut aaliangiinissamut sunniuteqarsinnaasut tamarmik ilanngunneqassapput.
Eqqissisimasussanngortitsinermi illoq tamaat, illup silataa, illup ilaa imaluunniit illup avatangiiserisaa pineqarsinnaavoq taamaaliortoqarsinnaavorlu ataatsimut isigigalugu arlaatigut eqqissisimasussanngortinneqartumut attuumassuseqarpat.
Eqqissisimassussanngortitsiniarluni suliaq aallartittarpoq Nunatta Katersugaasivianut Allagaateqarfianullu saaffiginnittoqarsimatillugu illup aaliangersimasup eqqisisimasussanngortinneqarnissaa siunertaralugu. Suliaq aallarnerneqartarpoq Nunatta Katersugaasivia Allagaateqarfialu aaliangiisimatillugu, tassanngaanniillu Kulturikkut eriagisassat siunnersuisoqatigiivinut eqqissisimasussanngortitsinissamut siunnersuut saqqummiunneqartarpoq. Tassanilu illut assigiinngisut eqqartorneqarsinnaapput, ataatsimullu assigiissutigisassaat tassaavoq piffissamut aaliangersimasumut oqaluttuassartaqassasoq siunissamilu inuiaqatigiinnit soqutigineqarsinnaanissaa.
Eqqissisimasussanngortitsisarneq imak ingerlariaaseqartarpoq
Eqqissisimasussanngortitsineq killeqarneq ajorpoq. Taamaattumik eqqissisimasussanngortitsiniartoqartillugu suliaq ingerlanneqartarpoq ilisimasaqartut atornerisisugut, innuttaasullu allallu eqqissisimasussanngortitsisoqarnissaanik soqutiginnissinnaasut akuutinneqarlutik. Taamaattumik suliaq sivisuumik ingerlasarput inatsisitigut aaliangersakkat killiffiit tulleriaagassat annertusinnaasarmata.
Nalinginnaasumik eqqissisimasussanngortitsinianermi ingerlariaaseq:
1.Nunatta Katersugaasivia Allagaateqarfialu saaffiginnissummik eqqissisimasussanngortitsinissamik siunertalimmik tunniussissapput, tassanngaanniillu siunniunneqarpoq illoq eqqissisimasussanngortitsisoqassasoq. Saaffiginnissut assitaqarpoq paasissutissanillu allanik imaqarluni, kisianni NKA aamma nammineerluni paasissutissanik piniartarpoq, assersuutigalugu illumik titartaasimasup illut allat titartarsimasai, illup piffissami aaliangersimasumi oqaluttuassartaa, arlaannik piffissamut aaliangersimasumut tunngasunik iluseqarnersoq il.il. NKA'llu illoq misissoriartorlugu.
2. Tassanngaanniillu Nunatta Katersugaasivia Allagaateqarfialu aaliangertarpoq eqqissisimasussanngortitsinissamik suliaq aallartinneqassanersoq. Akuersisoqarpat eqqissisimasussanngortitsinissamut siunnersuut Det særlige bygningssyn ved Kulturministeriet-mut saqqummiunneqartarpoq. Itigartitsisoqassappat saaffiginnittumut tamanna ingerlateqqinneqartarpoq. Aaliangiineq suliassiissutigineqaqqissinnaasarpoq.
3. Kulturikkut kingornussassanut siunnersuisoqatigiit eqqissisimasussanngortitsinissaq nalilersortarpaat. Eqqissisimasussanngortitsinissaq ingerlateqqinneqarsinnaasarpoq aatsaat siunnersuisoqatigiit siunnersuutigippassuk. Kulturikkut kingornussassanut siunnersoqatigiit isumaqarunik illoq eqqissisimasussanngortinneqartariaqanngitsoq, taava siunnersuut atorunnaarsinneqartarpoq, aaliangiussarlu suliassiissutigineqaqqissinnaanngilaq.
4. Kulturikkut kingornissassanut siunnersoqatigiit isumaqarunik illoq eqqissisimasussanngortinneqassasoq, taava piginnittoq, atuisut, kommune, illoqarfigisami katersugaasivik allallu peqatigiiffiit illoqarfimmut attuumassusillit allakkatigut saaffineqarumanikut saaffigineqassapput.
5. Taamaasiortoqarnerani aamma illoqarfigisami aviisimi allagarsiisoqassaaq eqqissisimasussanngortitsinermut siunnersuummik, tassanilu tamanut tusarniaaneq aallartittarpoq. Tusarniaaneq qaammatini pingasuni ingerlanneqartarpoq. Piffissami tassani eqqissisimasussanngortitsisoqarnissaanut ilanngussassat Nunatta Katersugaasivianut Allagaateqarfiunullu nassiunneqassapput. Tusarniaasoqarnissaanut allagaq nassiunneqareersimappat illumi allannguisoqarniarpat akuersissummik Nunatta Katersugaasivianut Allagaateqarfianullu qinnuteqaqqaartoqartariaqarpoq. Soorunami aamma illoq isaterneqaqqusaanngilaq.
6. Tusarniaaneq naammassisimalerpat Nunatta Katersugaasiviata Allagaateqarfiatalu nalilersussavaat NKA'p eqqissisimasussanngortitsinissaq atuutsilissaneraat, naliliinermilu ilanngussassat tusarniaanermi nassiunneqarsimasut ilanngunneqartarput. NKA aaliangeereeriarpat piginnittoq allakkatigut paasitinneqassaaq, arlaatigullu illumut attuumassusillit aamma allamik pisinnaapput. Nunatta Katersugaasivia Allagateqarfialu eqqissisimasussanngortitsinissaq itigartissutigisinnaavaa, namminerluunniit suliaq aallartissimagaluaruniuk Kulturikkullu kingornussassanut siunnersuisoqatigiit isumaqataanngikkaluarpata.
7. Nunatta Katersugaasivia Allagaateqarfiatalu aaliangissaa akuersissutaagaluarpat itigartitsissutigineqaraluarpalluunniit, suliaq Naalakkersuinut suliareqqitassanngorlugu nassiunneqarsinnaavoq. Aaliangiissut suliassiissutigineqaqqinngippat Nunatta Katersugaasiviata Allagaateqarfiatalu aaliangernerup inernera illoqarfigisami aviisini saqqummiutissavaa. Aaliangiineq eqqissisimasussanngortitsisuuppat Nunatta Katersugaasiviata Allagaateqarfiatalu illoq pillugu eqqartuussivikkut nalunaarsuititsissapput.
8. Nunatta Katersugaasiviata Allagaateqarfiatalu aaliangiussaa Naalakkersuisunut suliassiissutigineqaqqippat, Naalakkersuisuni ilaasortat aaliangernissaat utaqqineqassaaq. Qaqugu suliap suliareqqiissutip suliarineqarnissaa piffissalerlugu taaneqarsinnaanngilaq. Naalakkersuisuni ilaasortat aaliangeeriarpata Nunatta Katersugaasivia Allagaateqarfiatalu aaliangiissut illoqarfigisami aviisini aaliangiissut saqqummiutissavaa.