Ataavartitsiniarneq
Piffissap takutippaa illut eqqissisimasuutitat tamarmik aserfatsaaliorneqarsinnaanngitsut, taamaaliortoqanissaanummi atortussaqanngilagut, aammalu eqqarsaat taanna takorluugaavoq inornartoq. Nalilersortussaavarput illut sorliit innimigalugit suliassaanersut, sorliillu piffissap piumasai piumasaqaatailu sapinnginnerai. Taamaattumik eqqarsaatigisariaqarparput illoq oqaluttuassartalik imaqartariaqartoq, taannalu siunissamut ataavartinneqarsinnaalluni.
Illoq nakkaatilersoq nunamut eqqaminiittumut sunneeqataasarpoq, illullu suliarineqarnera arlaatigut aaqqissuukkaanni illup pitsaassusaa 99 %-imik naatsorsuutigineqarsinnaavoq illunit nutaalianiit pitsaanerulersimanissaa, tassami taamanikkut sisuit atorneqartartut ullumikkut pissarsiarineqarsinnaanngillat. Taamaattumik aaqqissuusisoqarniartillugu pingaaruteqarpoq atorneqarnikut isugutammit ajoquserneqarsimanngitsut atorneqaqqinnissaat, tamannalu aamma siumungaaq isigigaanni aningaasartuutit eqqarsaatigalugit ajunnginnerusarpoq.
Illup pisoqaassusaa malillugu isiginiarneqartarpoq - imaanngilaq isikkorissarneqassasoq, taamaasiornikkummi tatiginarunnaarlunilu uppernarunnaassagami! Ilami oqaluttuarisaanermi inuunikuuvoq, tamannalu takuneqarsinnaassaaq, taamaakkaluartorli oqaluttuarisaanermi pisoqaassusiminilu kusanarnerpaassalluni.
Pissutsit sisamat aaliangiiniarnermut pingaarnerpaatitat: Illup peqqaassusaa, uppernassusaa, suussusaa oqaluttuassartaalu.
1) Illup peqqaassusaa
Illut qassit ilumoortuuppat pileqqaarnerallu uppernarsarneqarsinnaappat. Illoq peqqaarsimasoq sananeqaqqaaramili atortorisimasanik sanaajuvoq, piffimminiillu nikisinneqarsimanani. Illu ilaarlugu sanasoqarsimappat ilumuussusaa tammartarpoq, taamaasilluni oqalutturineqarnissaanut nalia aamma annaaneqartarluni.
2) Uppernassusaa
Tassani illup uppernassusaa atuuffialu atorneqartut pineqartarput. Illup nammineerluni illulioriaatsip ingerlanneqarnerani atorneqarsimasoq takussutissatigut piffissallu ingerlasimaneranit nungullarnerit takuneqarsinnaassapput.
3) Suussusaa
Tuluttut oqaaseq pitsaaneq tassaavoq: appearance. Isikkua suussusaalu, illup taassuma piffissami aaliangersimasumi atuuffigisimasaa isikkorisimassaalu - taakkualu pilersinneqaqqissinnaanngillat.
4) Oqaluttuassartaa
Illup nammineerluni oqaluttuassartani oqaluttuarissavaa, taannalu paasissutissiisuni pingaarnerpaassaaq. Illormi paasissutissiissaaq, atuagaassaaq atuartussamullu eqqarsalersitsisussaalluni.
Sulinermi eqqarsaatigisassat annertoorujussuupput, tassanilu aamma illup suliarineqartariaqalernissaa aamma ilaavoq, tassaallutillu illup annikitsumik aaqqissuuneqarnissaa, ataavartinniarnissaa, aserfatsaaliorneqarnissaa, illersorneqarnissaa, aaqqissorneqarnissaa, utertinneqarnissaa, suliareqqitaqartoqarnissaa aammallu annertunerpaaq: pissuserisimasaattut sanaqqinneq.
Ukunani taakkartorneqaruni nutarnerineq ilaasinnaavoq, tassanilu aamma aaliangerniarneqartariaqarpoq illumut aaliangersimasumut nutarnereriaaseq qanoq annertutigissanersoq.