NKA’p illuutai
![NKA’p illuutai](https://d17lvcyg82bpoz.cloudfront.net/typo3temp/assets/images/csm_nka_luftfoto_2006_68ea83f6e3_5647e73c11.jpg)
Nunatta Katersugaasivia Nuutoqqami, Hans Egedep aqqutaani, quersuakuni inissisimavoq. Illut tamarmik B-nr-mulersorneqarsimapput (illut normui). Illut tamangajammik nutaanngitsuupput, taamaattumillu ataatsimut isigalugit piujuaannartinneqartariaqarlutik, ilailu eqqissisimasussaatitanngortinneqarsimallutik. Immamut isikkivissuaq illullu kusanassusasa ataatsimoorlutik Nunatta Katersugaasivia kusanarnerulersippaat.
B-36
![B-36](https://d17lvcyg82bpoz.cloudfront.net/typo3temp/assets/images/csm_1_b-36_1aca33c325_4917c5b257.jpg)
Hans Egedep aqqutaa 17-imi B-36 inissisimavoq – katersugaasiviup nammineerluni sannavia. Illoq eqqissisimasussanngortitaanikuuvoq 1851-imilu sananeqarsimalluni. Siornatigut napparsivittut atortuusivittullu atorneqartarsimavoq. Taassumalu kingorna iffiorfiusimalluni soorluttaaq aamma qalipaasut sannavigisimagaat. 1758-ikkut missaanni inissisimaffimmi tassani oqaluffik siulleq sananeqarsimavoq, kingusinnerusukkullu tassa 1772-imi inissisimaffimmi aamma tassani allamik oqaluffiliortoqaqqissimalluni. Taamaattumik qularnanngilaq B-36-imik sanasoqarnerani oqaluffitoqqaninngaanniit ujaqqat atorneqaqqissimanissaat.
B-43
![B-43](https://d17lvcyg82bpoz.cloudfront.net/typo3temp/assets/images/csm_IMG_3636_2947431825_4486ce3ee8.jpg)
B-43 Hans Egedep aqqutaa 21-mi inissisimavoq. Illoq eqqissisimasussaatitaavoq ullumikkullu katersugaasiviup tikeraavinut atorneqartarluni. Illoq 1841-rumi sananeqarsimavoq siornatigullu taquaarniarfiusimalluni ”Godthåb Butik”-imik ateqarluni – taannalu illoqarfimmi 1947 tikillugu kisiartaalluni pisiniarfeeraasimavoq. Taassuma kingorna atortussaarniarfittut suliarineqarsimavoq kingusinnerusukkullu illup angisoortaa naqiterivittut atorneqarsimalluni.
B-66
![B-66](https://d17lvcyg82bpoz.cloudfront.net/typo3temp/assets/images/csm_Kopi_af_NKA_ed4870db02_66c58d523c.jpg)
B-66 Hans Egedep aqqutaa 12-imi inissisimavoq angilaartukasiullunilu. Illoq piujuaannartussaatitaavoq ullumikkullu Katersugaasivimmi saqqummersitat Inuit Nutaat – Thulekulturi takuniarneqarsinnaasarput, tassaniipporlu aamma katersugaasiviuk toqqorsivia atuagaateqarfialu. Illoq ”Betonpakhuset”-mittaaq taaneqartarpoq, 1935-1936-imilu sananeqarsimalluni, taannalu Kalaallit Nunaanni betonimik illuliani siullerpaasimalluni. 1949-imi illoq aqqusernut tungaanut allilerneqarsimavoq, taamaattumillu maannakkut Nuutoqqami tattoqippaluttutut misigititsilluni. Illoq sananeqarsimavoq ikkummatissanut ilisivissatut, 1981-1982-ikkulli nalaanni Katersugaasivimmut attuumassuteqalersimalluni. Tassunga atatillugu illoq natilersorneqarnikuuvoq, naterlu suli maannamut atuuppoq.
B-70
![B-70](https://d17lvcyg82bpoz.cloudfront.net/typo3temp/assets/images/csm_Nuuk__B-70__1__e08940ec40_f5702f0832.jpg)
Illuarannguaq B-70 Hans Egedep aqqutaa 25-imi inissisimavoq. Illoq piujuaannartitassatut inissisimavoq ullumikkullu katersugaasiviup pequusiviatut atorneqarluni. Illoq 1846-imi sananeqarsimavoq immiorfittut saffiorfittullu atorneqaqqaarsimavoq, tamannalu illup pujoortiata aappaatigut maannakkumut marluusuni takuneqarsinnaalluni. Kingusinnerusukkullu illoq aamma iffiorfikkut atorneqarsimalluni.
B-74
![B-74](https://d17lvcyg82bpoz.cloudfront.net/typo3temp/assets/images/csm_Nuuk__B-74__1__fdcb84aa19_379b1784a6.jpg)
B-74 Hans Egedep aqqutaa 27-imi inissisimavoq nunaannarmioorpalaarlunilu. Illoq eqqissisimasussaatitaavoq ullumikkullu katersugaasiviup napparsivik pillugu katersugaanut takutitsiffiulluni. Illoq 1907-1908-kkut nalaani sananeqarsimavoq, 1922-imilu allilerneqarsimalluni. Illu atorneqaqqaalermat petroliummimut inissiiffittut atorneqarsimavoq, kisiannili napparsiviup 1949-imi ikuallannerata kingorna illoq ujaqqamik sanaaq napparsivissatut aaqqissuunneqarsimavoq, 1969-illu tungaanut napparsivittut atorneqarsimalluni.
B-81
![B-81](https://d17lvcyg82bpoz.cloudfront.net/typo3temp/assets/images/csm_IMG_0217_2873954309_c7872eac79.jpg)
B-81 imaluunniit ”quersuaq qernertoq” Hans Egedep aqquserna 19-imi inissisimavoq. Illoq piujuaannartitassatut inissisimavoq ullumikkullu katersugaasiviup toqqorsiviattut atorneqarluni. Illoq 1927-imi sananeqarsimavoq qisunnut quersuassatut atugassiaralugu. Quersuup qaliani ”C11”-imik allassimasoqarpoq, taannalu aappassaanik sorsunnersuaqarneranut atatillugu allanneqarsimavoq, tassami Kalaallit Nunaat qulaallugu ilerisatta timmisartorlutik ingerlaaraangamik allaqqasoq Nuummut ilisarnaatitut atortarsimammassuk.
B-1859
![B-1859](https://d17lvcyg82bpoz.cloudfront.net/typo3temp/assets/images/csm_1._stenpakhus_25c2f8373d_faa594feb1.jpg)
B-1859 illuuvoq anngajaalaakasik Hans Egedep aqquserna 8-mi inissisimasoq. Illoq piujuaannartitassaavoq ullumikkullu katersugaasiviup ”Inuit angallataat”-nik takutitsiffittut atorlugu. Ujaqqanik illuliaq, soorlu aamma illu taamak taaneqartartoq, 1928-imi sananeqarsimavoq, siornatigullu aalisakkanut panersikkanut tarajortikkanullu ilitsivittut atorneqartarsimagaluarluni. Illu ujaqqanik qammakkatut taaneqartarneranut peqqutaavoq, illoq ujaqqat qarmasissiat atorlugit sananeqarsimagami. 1977-1978-ikkut nalaanni illu katersugaasivissatut atorneqarnissaannut aaqqissuunneqarsimavoq, ullorlu 1991-imiit 2007-ip tungaanut allagaateqarfittut atorneqarsimalluni.
B-1860
![B-1860](https://d17lvcyg82bpoz.cloudfront.net/typo3temp/assets/images/csm_1._b-1860_00f93cc9cd_4329e848c7.jpg)
B-1860, ullumikkut ”quersuaq aappaluttoq”-tut taaneqartartoq Hans Egedep aqqutaa 10-mi inissisimavoq. Illoq piujuaannartitassaavoq ullumikkullu katersugaasiviup ”Palæo –inuit” aammalu Issittumi nunaatillit – Qallunaatsiaat” pillugit takussutissiai illumi tassani takuneqarsinnaallutik, illullu ilaa katersugaasiviup pequusiviatut aamma atorneqarpoq. Illoq 1924-imi sananeqarpoq siullertullu aalisakkanut ilitsivittut atorneqarsimalluni. 1980-imiit 1981-imut illoq isikkorisimasaattut aaqqissuunneqaqqissimavoq taassumalu kingorna katersugaasiviup ilaattut atorneqalersimalluni.