Ajoqersuiartortitap Gustav Olsen-ip Thulemiit ullorsiutai 1909-miit-1920-mut
![Ajoqersuiartortitap Gustav Olsen-ip Thulemiit ullorsiutai 1909-miit-1920-mut](https://d17lvcyg82bpoz.cloudfront.net/typo3temp/assets/images/csm_0011F01498_eb616ef7dc_31bf0c016a.jpg)
Gustav Karl Eli Olsen, inuusoq decemberip 27-anni 1878-mi Sisimiuni, toqusorlu 7. august 1950 Sisimiuni. Ukioq 1900-rujumi Nuummi Ilinniarfissuarmi ajoqitut soraarummeerpoq. Maniitsup pigisaani Qipingasumi, Sisimiuni Ilulissanilu ajoqiunertut suleqqaarluni 1909-mi ajoqersuisutut Thulemi siullerssalluni sulilerpoq, ukiullu tulliani Knud Rasmussen-ip namminersorluni niuerfik pigilerpaa. Taamani nutaamik pilersinneqartup Den Grønlandske Kirkesag-ip aningaasanik katersuiniarnikkut ajoqersuisoqalernissaa piviusunngortippaa. Ajoqersuisorlu siullerpaaq tassaavoq Gustav Olsen. Gustav Olsenillumi Ilinniarfissuarmili atuarallarami ajoqersuisunngornissani kissaatigisimavaa. Suleqataa ajoqiuneq Sechmann Rosbach avanersuarmut malinnippoq. Gustav Olsen 1913-mi ukioq ataaseq Upernavimmi ukiitsiariarlutik nuliilu Ane Sophie (inunnguuseralugu Berthelsenimik naggateqartoq) 1920-ip tungaanut avanersuarmiipput.
Atuakkat inuit namminneq inuttut atorfilittullu akulerussanik ullorsiutaattut taaneqartariaqarput, ajoqersuinermilu sulineq pillugu allagaanerupput. Atuakkat ilai allattuivittut atorneqartarsimapput, soorlu qanigisami inuit kisinneqarnerinut tunngassuteqartunik imaqartarlutik. Atuakkat ataasiakkat soorlumi Ane Sophiemit allaneqarsimassasut, - aammattaaq atuartitsinerminni ullorsiutinillu allannerminni suleqatigiittarsimasut nalunanngilaq. Ullorsiutit ulluinnarni pisartunik Avanersuarmilu inuit pillugit paasissutissarpassuarnik imaqarput. Taamani Avanersuaq nunasiaqarfinnut suli ilanngunneqanngilaq. Aatsaat 1937-mi Knud Rasmussen-ip pigisai naatsorsorneqarmata niuertoqarfillu Danskit naalagaaffiannut tunineqarmat nunap sinneranut ilanngutsinneqarpoq.
Maani oqaluffiup allattaavia siulleq 1909-miit 1939-tungaanut suliarineqarsimasoq takuneqarsinnaavoq.