Puggut anernerat - Inalukkereriaatsit nutaaliornerlu
Projekti Puggut anernerat - Inalukkereriaatsit nutaaliornerlu (2024-2026)
Amernik mersortartoq Sofie Amondsen (Kalaallit Nunaat), annoraamineq atorlugu eqqumiitsuliortoq Julie Bach (Danmark) aamma Nunatta Katersugaasivia ataatsimoorussaminnik projekteliorput inalukkat aallaavigalugit eqqumiitsuliorneq aamma kulturikkut kingornussatta paasissutissartaannik sammisaqartumik.
Siunertaavoq tamanit paasineqarsinnaasumik puisip inalugaanik passussisarnermi periaatsinik ilinniartitsinissaq, ileqqoq nunatsinni arriitsumik tammariartuaartoq pinaveersaartinniarlugu. Projektimik ingerlatsisut isumaqarput inalukkerinerup isumaa, qanoq passunneqartarnera suullu periaatsit atorneqartarnersut pillugit iliuuseqarfigineqartariaqartoq tammatsaaliorneqassasorlu. Suliniummi misileraalluni suliassat aqqutigalugit ingerlanneqarput, ilisimasat annertusarneqarnissaat kisiat anguniarneqanngilaq,tassami inalukkerinermi periaatsit nammineq ataasiakkaarluta misilittarpavut, aamma kulturikkut suliaqartut akornanni isumassarsiorfiusumik suleqatigiinnermik siuarsaasuuvoq kiisalu ileqqut pingaaruteqartut tammatsaaliorneqarnissaannut avitseqatigiissutigineqarnissaannullu iluaqutaasoq.
Inalukkat panertitat atortussatut oqitsutut, anersaartortutut aamma sitsiaatsutut ilisimaneqarpoq. Ilisimasat taakku atorlugit Julie Bachip aamma Sofie Amondsenip ukiamut Katersugaasivimmi suliaminnik immikkut saqqummersitsissapput.
Saqqummersitami takutinniarneqarpoq inalukkanik suliat pisoqqat toqqortaatitsinniittut qanoq isumassarsiorfigineqarsinnaanersut assarsorluni nutaaliornermi aamma eqqumiitsuliornermi. Allatut oqaatigalugu, suliniutip pilersippaa siulitta inalukkanik assasassorlutik mersugaat aamma nutaaliorluni assassukkat imminnut atassuserneqarnarnerat.
Katersaatit aamma allagaatit aqqutigalugit nalunngilarput inalukkerineq Kalaallit Nunaanni Inuit atortorisarsimagaat pequtitut, atisatut, ukiivinni igalaatut, toqqup umiatut aamma
qilaatip isaatut.
Ullutsinni inalukkat nerisassiarineqartarput mamarsaatigineqarluartartunik, amerlanertigut nerisaatitoqatsinnut akugalugit nalliuttorsiornermilu nerisassiani. Nalinginnaanerpaajuvoq
inalugaq uuginnagaq. Inalugaq uusoq aqitsunngortarpoq, taamaliinnarlugu sassaalliutigineqartarpoq imaluunniit orserlugu neqilerlugulu. Inalukkat panertitat aamma
nerineqartarput, taakku kimittunerupput. Naak inalukkat nerisassatut mamarilluarneqaraluartut atorneqartarneri ukiut ingerlanerini allanngoriartorsimavoq.
Nereriaatsip allanngoriartornera nerisassallu allat pisiassanngorneri pissutaalluarunarput. Taamaattorli kulturikkut kingornussatta ilaat inoqutigiinni amerlasuuni attatiinnarneqarpoq
aamma kinguariit tulliinut ingerlateqqinneqarluni. Taamaattumik suliniut assassornerup aamma annoraamineq atorlugu eqqumiitsuliorneq ilippanaatai qaangerlugit inalukkat
inuiaqatigiinni aamma allatut atorneqarsinnaaneri takutinneqarput. Nutaamik pilersitsinissamut aamma periarfissiivoq.
Ilisimasanik avitseqatigiilluni suliaqarneq
Februaarip 18.-ianiit 25.-ata tungaanut 2025
Suliniummi qangatut inalukkerisarnermi saliineq, panersiineq, killuineq mersornermilu kilut sitsiaatsut atornerinik ilisimasanik katersuiffiuvoq.
Suleqatigiit Nuummi amernik mersortarfik Kittat peqatigalugu assassorluni suliaqaatigaluni qangatut inalukkerinermut ilisimasanik tunngasunik avitseqatigiipput.
Immikkut saqqummersitaq
Septembarip 25.-niit 2025 - februaarip 23.-nut 2026
Ukiaanerani ukiorulu saqqummersitap eqqumiitsuliorneq, assassorneq oqaluttuarisaanerlu ataatsimoortillugit atassuserpai.
Julie Bachip saqqummersitassani pilersinnerani imminut tarnikkut timikkullu ajorunnaarsarluni mersornissani aallutissavaa. Saniatigullu saqqummersitamut pulaartut timertik misigissutsitillu imminnut atassuteqartilernissaannut kajumissaasinnaasumik pilersitsissaaq.
Sofie Amondsenip qangatut inalukkanik mersorneq nutaaliornermik atassuserniarpaa, aallunnerussallugu sitsiaatsunik kilulersuineq taamaalillunilu qanganitsat nutaaliallu
atassuserlugit. Nunatta Katersugaasiviata oqaluttuarisaanerput oqaluttuat, ilisimatusarneq aamma katersat aqqutigalugit puisit inalugaasa kulturitsinnut pingaaruteqassusiat
saqqummersitami takutinniarpaa.
