Isumagioqatigiisitsineq

Pilot projekti: Eriagisat uumassusillit pillugit isumasioqatigiinneq (2023)

Nunatta Katersugaasivia Allagaateqarfialu ulloq 18. april 2023 ammerisunik, assassortartunik, ilusilersuisartunik, sammisassaqartitsisartunik, saqqummersitsivilerisunik, katersugaasivilerisunillu oqaloqatigiisitsilluni isumasioqatigiisitsivoq.

Qangaaniilli assassornermi ileqqut, ammereriaatsinut ilisimasat, qiperuinerit ilusilersuinerillu atorluaanikkut pilersinneqarsimasut, qanoq ullutsinni ingerlatinneqarnersut paasisaqarfigalugit isumasioqatigiinneq saqqummiinernik imaqarluartumik ingerlanneqarpoq. Ataatsimullu qanoq sanalukkanik atorluaanerup piujuartinneqarsinnaaneri eqqartorneqarlutik.

Eriagisat uumassusillit assassornerup, qiperuinerup, ilusilersuinerullu silarsuaani aallunneqartut pillugit isumasioqatigiisitsisoqarnerani eqqartorneqartut saqqummiunneqarneri quppersagaaqqami uani atuarsinnaavatit.

Aaqqissuussaq LIVIND projektimit ingerlanneqarpoq. LIVIND tassaasoq Europami Nunat avannarlerneersut akornanni ataatsimoorissamik projekteq ingerlanneqarsimasoq, Nunatta Katersugaasivia peqataaffigisaani. LIVIND projektip anguniagarivaa eriagisat uumassusillit pillugit qaammarsaanissaq. Isumasioqatigiisitsineq kiisalu quppersagaaqqamik pilersitsisinnaaneq NAPA aningaasaleeqataaneratigut piviusunngortinneqarpoq.