Quppersagaaraq
Nunatta Katersugaasivia Allagaateqarfialu ukioq 2023 ammerisunik, assassortartunik, ilusilersuisartunik, sammisassaqartitsisartunik, saqqummersitsivilerisunik, katersugaasivilerisunillu oqaloqatigiisitsilluni isumasioqatigiisitsivoq.
Eriagisat uumassusillit assassornerup, qiperuinerup, ilusilersuinerullu silarsuaani aallunneqartut pillugit isumasioqatigiisitsisoqarnerani eqqartorneqartut saqqummiunneqarneri quppersagaaqqami uani atuarsinnaavatit.
Aaqqissuussaq LIVIND projektimit ingerlanneqarpoq. LIVIND tassaasoq Europami Nunat avannarlerneersut akornanni ataqatigiissitaq, Nunatta Katersugaasivia peqataaffigisaani. LIVIND projektip anguniagarivaa eriagisat uumassusillit pillugit qaammarsaanissaq. Isumasioqatigiisitsineq kiisalu quppersagaaqqamik pilersitsisinnaaneq NAPA aningaasaleeqataaneratigut piviusunngortinneqarpoq.
Kulturikkut kingornussat tigussaanngitsut
Nunatta Katersugaasiviata Allagaateqarfiatalu akisussaaffiisa ilagaat Nunatsinni kulturikkut kingornussat eriagisassat tigussaanngitsut illersussallugit. Suliffeqarfiup piorsarsimassutsikkut kingornussat tigussaanngitsut Nunatsinniittut suuneri inuiaqatigiit, inuit ataatsimoortut kattuffiillu attuumassuteqartut peqataatillugit nalunaarsorlugillu nassuiassavai, taakkulu allattorsimaffiannik ingerlaavartumik nutarterisassalluni.
2003-mi UNESCO-mi isumaqatigiissut The Convention for the Safeguarding of Intangible Cultural Heritage atsiorneqarpoq, tamannalu aamma Nunatsinni 2009-mi atuuttussanngortinneqarluni. Isumaqatigiissutip kaammattuutaasa ilagaat nunat naalagaaffiillu atsioqataasut takussutissiillutik ileqqunik atuuttunik kingornussanillu tigussaanngitsunik saqqummiussissasut. Taamaammat quppernerni ukunani takusinnaavatit ileqqunik ilisarititsinerit. Taakku ingerlaavartumik ilaartorneqartuarput nutarterneqartuarlutillu.
Aallaqqaammut NKA-p qulequttat nalunaarsorlugillu suussanersut toqqarsimavai. Kisianni siunissamut siunniusimavarput kattuffiit inuillu ataasiakkaat suleqatigalugit nalunaarsukkavut ilaartussallutigit. Taamaalinikkut pisaatsit, isummat, taaguutit, ilisimasat, piginnaasat, taamatullu aamma atortut, pigisat, assassorluni pilersitat piorsarsimassutsikkulluunniit ataatsimoorfiit, inuiaqatigiinnit, inunnit ataatsimoortunit, ilaannikkullu aamma inunnit ataasiakkaanit kulturikkut kingornussat ilaattut akuerisat nalunaarsorneqarsinnaaqqullugit.
ICH UNESCO 16.COM
Decembarip 15-iani 2021, UNESCO-p ukiumoortumik Parisimi ataatsimiinnermini qilaatersorneq inngernerlu kulturikkut kingornussassartut inuiassuit nalunaarsorsimaffiannut allattorsimasussatut aalagangerpaa.
Tusagassiortunut nalunaarut uani atuarneqarsinnaavoq. Ammaruk
UNESCO-p ataatsimiitsitaliaasa aalajangiinernimi missingersuutaa uani atuarneqarsinnaavoq. Ammaruk