Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Kakiuineq

Kakiuineq nunarsuarmi tamani takussaavoq, ilisimaneqanngilarli qanga Inunniit kakiuneq atorneqalersimanersoq. Kakiuineq ingerlanneqartarsimavoq ujaloq paaterneqarsimasoq atorlugu, taannalu ammip iluatigut ingerlaartinneqartarsimavoq meqqut atorlugu, taamaasiornikkullu qalipaat paaminngaanneersoq kakiuinermi qalipaatigineqartarsimavoq. Angutit kakiorneqarsinnaasarput, kisiannili arnaanerusimapput kakiorneqartartut. Arnat kakiortinneri meeraanermiit inuusuttuaranngornermut ileqqutut atorneqartarsimapput. Angutillu kakiorneri piniagarisimasanut nalunaarsuutitut atorneqartarsimallutik, soorlu arferup pisarisimasap tarninga kakiorneqartarsimalluni.
Kakiuineq

Arnat kiinnamigut, niumigut, talimigut assamigullu kakiorneqartarsimapput. Kiinnakkut takiorneri tassaakkajunnerusimapput titarnerit toornerilluunniit siggut nalaanniit tallup nalaanoortut. Angutit kakiorneri pisariinnerusimapput, taakkualu kiinnamiinnginnaangamik talianiittarsimapput. Taakkualu piniakkat pisarisimasat suusimaneritut nalunaarsuutitut isumasiorneqarsimallutik.

Arnat Qilakitsuminngaanneersut qaaminni titarnernik kakiorneqarsimapput. Ataatsillu isaaniit siutaanut titarneqarsimalluni, sisamallu ulussakkut kakiorneqarsimallutik. Pingasut tallukkut kakiorneqarsimapput. Arnani angutinilu kakiorneqarsimanikkut takussutaasinnaasarsimapput illup iluani suliassanut qanoq pikkoritsigisimanerluni qanorlu pinerraritsigisimanerluni, immaqaluni aamma inooqatigiit iluanni qanoq inissisimaneq tassuuna takuneqaarsinnaasarluni. Alaskaminngaanneersoq qulleq orsutortoq sillisissamik sanaaq nassaarineqarnikuusimavoq 450 kr.in.king., taassumalu ataa inuup kiinaanik ilusineqarsimavoq kakiorneqarsimallunilu tallukkut, uluakkut, tullikkut qaakkullu. Dorsetkulturikkut Thulekulturikkullu aamma kakiueriaaseq taanna atortarsimavaat, soorlu aamma Qilakitsuminngaanneersut timit paniinnarnikut tamanna takutikkaat (1475).

Kalaallit Nunaata nunasiaataalernerani ileqqoq taanna sukkasoorujussuarmik Kitaani tammariartupallassimavoq, tassungalu peqqutaasorineqarpoq ajoqersuiartortunit kakiuisarneq kristumiussutsimut atassusileruminaatsinneqarsimanera. Tunumili kakiuisarneq sivisunerusumik atorneqarsimavoq, kisiannilu qanoq isumaqarneranik paasissutissat pissarsiariuminaassimallutik. Arnanulli pingaaruteqartorujussuusimasoq Hans Egedep erseqqissumik imak oqaatigaa: Den, hvis ansigt ej således er borderet, dens hoved, sige de, bliver til en tranbøtte, som skal sættes under lampen, når de kommer i himmelen eller sjælens land. 

 

Najoqqutarisat:

Egede, Hans. 1741. Det gamle Grønlands ny Perlustration.

Thalbitzer, William. 1914. The Ammassalik Eskimo, First Part. Medd. om Grønland 39.

CloseClose

Ujarfigiuk Nunatta Katersugaasivia Allagaateqarfialu

By using this website, you agree to the use of cookies to give you the best user experience.Ok