Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Juullikkut

Juullikkunni kristumiut ileqqorpassuaqarput, ileqqullu inoqarfimmit inoqarfimmut assigiinngiiaarsinnaapput. Assigiinngiiaarsinnaasullu tassaasinnaapput nerisassat imaluunniit pissutsit. Naalagiarnerli taannaajuaannarpoq ilaqutariippassuarnullu pingaaruteqartaqaluni nalliuttorsuit nalaanni. Qangaanerusoq 24-iat meeqqanut ullorititaavoq, 25-iat nalliuttorsuartut taannalu inersimasut utoqqaallu ullorivaat 26-iallu inuusuttut ulloralugu tamannalu qitimmik naggaserneqartarpoq. Juullikkut sapaassuup siulliup ulluani aallartinneqartarpoq naammassisarlunilu kunngit pingasuni januarip 6-iani.
Juullikkut

Nassuiarneqartut tulliusut tassaapput inuit Upernaviummi najugallit ileqqui:

Sapaassuannginnerani ulloq suliffiusoq kingulleq suliffeqarfiit qimannginnerini igalaani ullorissat ikinneqartarput.

Angerlarsimaffinni sapaassuit siullianni juullimut pinnersarnerit aallartinneqartarput, angerlarsimaffinnilu minnerpaamik ullorissat ikinneqartarput. Ukiuni kingulliunerusuni takussaaleraluttuinnarsimavoq pinnersaarsuaartarneq, maannakkummi ullorissat, qulleeqqat silami igalaanilu illullu sinaani takussaalernikuupput. Illup iluani unnuami aamma pikisunnguaqartarpoq: Siaartartut, igalaat pinnersarsimasarput, nissikkut nunaat saqqummerneqarsimasarput, tamannalu inuit namminneq nuannarisatik aallaavigalugit piareersartarpaat. Sapaassuit siullianni illoqarfiup orpia Kunngip Nunaataani ikinneqartarpoq. Orpik ikinneqareeraangat kommunalbestyrelseminngaanniit oqalugiartoqartarpoq, illoqarfiullu erinarsoqatigiivi tussiutinik tussiartarlutik - tussiarnerillu naggaserneqartarlutik Guuterput atorlugu. Tulliuttutullu biilit matoqqasumik lastillit nissiaqqanik marlunnik lastimi ilaasulerlutik aggertarput, taakkualu illoqarfimmi meeqqat 15-it inorlugit ukiullit sutugassaannik pajuttorneqartarput.

Qaammatip decemberip ingerlanerani suliffeqarfiit assigiinngitsut juullimut qiortaatitsisarput, suliffeqarfiillu tassaasarput atuarfik, meeraaqqeriviit, meeqqeriviit - soorunalimi aamma suliffeqarfiit allat qiortaatitsisarput, suliffeqarfiillu taakku aamma frukkortitsisarput (julefrokost). 

  • Ulloq decemberit 13-iat atuarfimmi meeqqeriveqarfinnilu sankta Luciartoqartapoq. Atuarfimmiit klassi meeqqerivimminngaanniillu meeqqat utoqqaat illuannut sankta Luciariartortarput.

  • Ulloq decemberip 24-iat (joorli imaluunniit joorliaraq - juulli imaluunniit juulliaraq) unnuakkut aallartittarpoq, tassami inuit iliveqarfimmi nalunaaqutaq unnuap-qeqqanut toqusimasut eqqaaniarlugit tussiariartortaramik. Taakaniinnerminnilu aamma ilerrit naneruusersorneqartarput. Unnuakkut orpiit pinnersaasersorneqartarput tunissutissallu orpiup ataanut iliorarneqartarlutik, ullaakkut ammariaannanngorlugit. Poortukkat ullaakkut orpiliareernerup kingorna ammarterneqartarput. Ulloq 24-iat aallarnerfigalugu ullup-qeqqata nalaani meeqqat illumiit illumut silatangiaallutik aallartittarput. Angerlasimaffimmi piginnittup matu ammartarpaa meeqqallu sutugassaannik mamakujunnik juullimullu iffiukkanik tunineqartarput.

  • Ulloq decemberip 25-iat (joorlerujutsuaq -  juullerujussuaq). Ilaqutariit imminnut pulaaqattaartarput ileqqoq malillugu. Ulloq 25-iat meeqqat silatangiaanitik ingerlatiinnartarpaat. Unnukkulli inersimasut silatangiaallutikk aallartittarput.

  • Ulloq decemberit 26-iat (joorlip nakkataa - juullip naggataa). Soorlu ippassaammat ulloq assigalugu ilaquttat kammalaatillu pulaaqattaarfigineqartarput. Katersortarfimmi fiisti pilersaarusiorneqartarpoq, taannalu inuusuttorpassuarnik peqataaffigineqartarpoq. 

  • Ukiortaannginnerani ulloq suliffiusussat kingulleq suliffeqarfiit qummoroortartarput ulloq suliffiusup naggataa ukiorlu nutaaq aallartittussaq nalliuttorsiutiginiarlugu.

  • Ulloq decemberip 31-iat (ukiutoqaq) ullup qeqqata nalaaninngaanniit meeqqat illumiit illumut igittaqattaartarput. Illumiittup matu ammariarlugu meeqqat sutugassaannik mamakujunnik qummoroortuaqqanilluunniit tunineqartarput. Kammagiit ilaqutariillu iluanni eqqarneq aamma atorneqartarpoq, taamaasiortoqartillugulu igittup imaluunniit igiffigineqartup suna tunniunneqassanersoq toqqartarpaa. Allaat illoqarfimmiit illoqarfimmut telefoni aqqutigalugu eqqartoqartarpoq, taamaaliornikkullu ilaqutariit kammagiillu qaninnerit iluanni poortukkanik tunniussuisoqartarpoq. Nalunaaqutaq 20.00 Danmarkip ukiortaarsiornera peqqutigalugu qummoroortunik aallartitsisoqartarpoq. Unnuap-qeqqanullu ukiortaaq qummoroortaatigineqartarpoq. 
CloseClose

Ujarfigiuk Nunatta Katersugaasivia Allagaateqarfialu