Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Inuit sanagaangamik angissutsinut uuttueriaasiat

Qanga inuit sanagaangamik uuttueriaaseq nammineq isumaq atorlugu ingerlanneqartarpoq. Inuit tamarmik uuttuuteqartarput tassaallunilu timertik. Timip pisatai atorneqartarsimapput angissutsit eqqaamanissaannut, atortussanullu sananissamut uuttuutigineqartarput. Uuttuutissatut atorneqartarsimasut ilaat tassaapput isanneq, talip takissusaa, inussap takissusaa, inussap silissusaa il.il. Kisiannili sulianut anginerusunut assersuutigalugu illunut qanoq uuttuisoqartarsimanersoq eqqoriaaginnarsinnaavugut.
Inuit sanagaangamik angissutsinut uuttueriaasiat

”Med håndfladerne vendt opad føres hænderne ind mod ydersiderne af rælingsbrædderne, hvorefter tommelfingrene anbringes på ribbematerialet over pegefingrene. Til lavere kajakker lægges to eller tre fingre til bredden, mens man til højere kajakker, som dem fra Kangaamiut, lægger fire fingre til på begge sider af kajakken.”

Taama ilitsersuut H.C. Petersenimit allaqavoq qaanniornermi tippik qanoq sananeqarnissaanut, tassanilu issuakkami paasissutissat amerlaqaat: Qaannamiittut tippit tamarmik uuttueriaaseq una atorlugu sananeqarsinnaavoq, qaannap portussusaa tassaallunilu qajannassusaa aaliangerneqartarpoq inussat qanoq amerlatigisut uuttuutaasimanersut tippip angissusissaa uuttorneqarnerani. Tassanilu aamma piffinniit piffinnut assigiinngissutaasartoq nassuiarneqarpoq. Uuttueriaaseq inuup pisataanit aallaaveqarmat, soorunami paasinarpoq inuk saattunnguanik inualik uuttuileruni inussat sisamat atornagit naatsorsuutigineqassasoq inussat tallimat atussagai.

Qajaq pinerratitut atugassiaammat aleq atortut pingaarnersaat ilarivaat - taamaattumillu alup pitsaassusaa ajunngilluinnartuusariaqarpoq, taamaanngippammi pisap aloq kittorartissinnaavaa. Alup takissusissaa naatsorsoqqissaarneqartarpoq piniartumut piniakkanulllu. Nalinginnaanerpaavorlu alup takussisigissagaa isannerit qulingiluat.

Qimminut anuliortoqarniartillugu pituutaliortoqarniartillugulu uuttueriaaseq aamma taamaappoq: Uuttueriaaseq aaliangersimasoq atorneqartarpoq anuliorniarnermi. Pingaaruteqartorujussuuvormi angissuseq ilumoortoq sananeqassasoq, taamaanngippammi qimmeq ajoquserneqarsinnaavoq, imaluunniit qimmip anersaartorniarnera ilungersunarsisinneqarsinnaavoq taamaasiornikkullu qimmip pisinnaanera killilersorneqalissalluni. Taamaattumik qimussertartut tamarmik qimmit angissusai eqqaamasariaqartarpaat, eqqaamassutissatullu atorneqartartut tassaammut assaat, itumak inussallu. Qimussertartullu tamarmik aamma namminneq uuttueriaaseqartarput pituutaa qanoq takitigissanersoq, tassanilu isannerit aallaavigalugit uuttuisoqartarluni.

 

Najoqqutarisat:

Petersen, H. C. Den store kajakbog.

CloseClose

Ujarfigiuk Nunatta Katersugaasivia Allagaateqarfialu

By using this website, you agree to the use of cookies to give you the best user experience.Ok