Nunatta Katersugaasivia Allagaateqarfialu
Grønlands Nationalmuseum & Arkiv
BurgerBurger
Arrow-simple-leftArrow-simple-leftArrow-simple-rightArrow-simple-right

Aarnussat

Inuit aarnuaqartarsimapput pissaaneqarneruniassagamik ajortunullu tarnernut ajortunullu piareersimaniarlutik. Napparsimanissarlu upalungaarsimaartinneqarsinnaavoq, inuuneqqortutsisinnaavoq, aammalu piniagassaqartitsisinnaallutik. Aarnussat inunnut aaliangersimasunoortuupput, isertuussaapput nalinginnaasumillu unngersanut mersuunneqartarput timimut qaninneruniassammata, imaluunniit atisanut, toqqinut, qaannanut umianulluunniit aamma mersugunneqarsinnaallutik.
Aarnussat

Aarnussat toqumut illersuutissatut atorneqartarsimapput taakkualu paarineqaannaavittarsimapput issittup pinngortitaani allanngoraqisumi. Inuit suna tamarmi aarnussatut aarnussalluunniit ilaattut isiginiartarsimavaat. Tassami aarnussat pisariaqartarsimanngillat immikkuullarissuunissaat, akisuujunissaat kusanarnissaalluunniit. Imaassinnaavoq aarnuaq meqqunik, qisuminernik, naasuminernik saanikuminernit imaluunniit uumasuminernit sanaajusimasut. Soorlu aamma ujaraasinnaasartut imaluunniit sapangaasinnaasartut. Aarnussat uumasut pisataanniit sanaajusimasut uumasup piginnaasaanik piginnittumut tunisisarput. Aarnussat ima sunniuteqarsinnaatigisimapput allaat pisussaagaluit aaliangersimasut pinngitsoortinneqarsinnaallutik.

Aarnussat tunniunneqarneq ajorsimapput ilivissanullu nassarneqartarsimallutik. Allap aarnuaanik tigusisoorsimagaanni arlaatigut ajortoqarujussuarsinnaavoq. Oqaluttuaq aarnussamut tunngasoq imaappoq: Kuungaseq inunngornerminiit nammineq arlaani aarnussatut pigisimavaa, taannalu qajaata aquaniittuaannarsimalluni. Taamaallutik nunaqarfiup ilaat piniartutoqaq Nulooq piniariassaarsimavoq qaannamik, qajaali kusanaqimmat Kuungasip qajat paarlaassimavai. Kisiannili paarlaakkamik Kuungasip puigorsimavaa aarnussami peernissaa, taamaattumillu Nulooq ajutoorujussuarpoq. Tassami taamaalluni qajallatuarnermini paarniaaluusaarsimasoq soorlugooq tassa tassa puussiap iluaniiginnarluni. Nunaqqataasa tamanna assut eqqumiigisimavaat taamaammallu qajaa toqqorsimallugu, ullualunnguillu qaangiummata Nulooq toqusimavoq. Nuluup paatsiveerusimaarsimanera toqusimaneralu Kuungasiå aarnuaanik peqquteqarsimavoq.

 

Ullumikkut aarnuaq suli ilisarnaatitut inuit ilaanni atorneqartarpoq. Inuit ilai aningaasaateqartarput iluanaartitsisussamik, ilaalu assigiinngitsunik kaasarfimmioqartarlutik taskermioqatarlutilluunniit ajortuusinnaasut pinaveersaartinniarlugit. Ullumikkut suli takussaavoq inuit aarnuangasunik ujamillit imaluunniit aarnuangasunik pisattallit soorlu timmissat niaqui, nannup niaqui imaluunniit kukii. 

 

Najoqqutarisat:

Lynge, Hans, 1955. Inegpait. Meddelelser om Grønland 90 (2).

CloseClose

Ujarfigiuk Nunatta Katersugaasivia Allagaateqarfialu

By using this website, you agree to the use of cookies to give you the best user experience.Ok