Saqqummersitat digitaliusut
Digitalimik saqqummersitagut oqaluttuanik, suliniutinik assigisaanilluunnit digitaliusumik assiliartallersukkanik allagartalersukkanillu imaqarput, sumiikkaluaraanniluunnit qarasaasiakkut oqarasuaatikkulluunnit qupperarneqarsinnaasut.
Matumani qulequttat assigiinngitsut pillugit digitaliusumik saqqummersitat iserfigalugit qupperarsinnaavatit.
Mapping NUNAAT – Nunatsinni nunanik assiliortarnerup qaqileqqinneqarnera
Saqqummersitami nunap assiliortarnerup nalinginnaanerusup nunap inoqqaavisa, Issitumi nutaamik qanoq isigineqarsinnaaneranik, atsersorneqarsinnaaneranik nunagineqarneranillu ersersitsivoq. Nunap inoqqaavi qanoq namminerisamik nunaminnik assiliortarnerat saqqummersitami ilaatigut paasisaqarfigisinnaavatit.
Ilisimasassarsiortut qimataat
Kalaallit Nunaanni ilisimasassarsiornissaq ukiuni arlalinni soqutigineqartuartarpoq. Ukioq 1853-miit 1934-mut ilisimasassarsiornerit 19-t ingerlanneqarput. Ilisimasassarsiortut ukua Avannaarsuani misissuinerminni pisattat, atortut sakkullu qimassimasaat maanna katersorneqalereersimapput.
Qimatat saqqummersillugit takusassiarineqarput.
NORDAFAR
Nunatta kitaani aalisartunut tunitsiveqarfiusimasoq NORDAFARi 1953-imi ammarneqarpoq 1985-imilu matuneqarluni. Tunitsiveqarfiusimasup oqaluttuassartaa saqqummersitami sammineqarpoq.
NORDAFARimut aalisartut Norgimeersut, Savalimmiuneersut, Danmarkimit Nunatsinnillu, kiisalu Europameersut tulattarsimapput. Tunitsiveqarfik pikialaarfiusimavoq maanna oqaluttuassanik ulikkaartoq. Illuliat sisamat immikkut ittumik oqaluttuanngorlugit saqqummiunneqarput.
Illuaqqat oqaluttuarput
Nunatta kangiata avannaani illuaqqat ukioq 1908-imiit 1960 ilanngulugu pilersinneqarsimasut qanoq oqaluttuassaqarnersut aqqusaagaqarsimanersullu saqqummersitami sammineqarput.
Illuaqqat paasisaqarfigiartorlugit saqqummersitaq alakkarniariuk.
NUNARPUT 1721-2021 NUNASIAATAANEQ. PIORSARNEQ. INUIAAT.
Ukiut 300-t nunasiaasimanerup oqaluttuassartaa saqqummiunneqarpoq. Oqaluttuarisaanermi qulequttat arfineq pingasut ilisaritinneqarput.
Hans Egedep 1721-imit ajoqersuilerneranit ullumikkumut pissutsit allanngorsimaqaat. Inuit amerlanerujussuanngorsimapput. Inuussutissarsiut piniarnerinnavimmiikkunnaarsimavoq. Inuit takorluuisinnaanerat kristumiussutsip pingaartitaanik ileqquinillu ilaneqarsimavoq. Ullumi nunarput namminersulersimavoq inuilu nunarsuarmioqataasut isumaqatigiissutaat malillugit inuiattut akuerineqarsimalereerput. Namminersuleriartorneq sakkulersorfiunani ingerlanneqarsimavoq. Oqaatsit ilaatigut sakkortuut atorlugit isumaqatigiinngiffiusarsimavoq tunngavilersuutit sakkugineqarlutik. Ullumi nunatta tunngaviusumik inatsisissaa suliarineqaleruttorpoq. Taassuma tungaanut aqqut takisimavoq aporfissaqangaatsiartarsimallunilu.