M/S Umanak

Ullutsinni nalunnginneqarluartoq timmisartuussineq atorneqalinngikkallarmat, umiarsuaq M/S Umanak 1950-ikkunni 1960-ikkunnilu Atlantikoq ikaarlugu angalasut ilaaffigisarsimavaat. Taassumalu saniatigut M/S Umanak aamma Kalaallit Nunaata sineriaani ukiualunni angallassissutaasimalluni. Helge Schulz-Lorentzen Tidskriftet Grønlandimut umiarsuaq pillugu imak allappoq (kalaallisunngorlugu): "M/S Umanak 2319 brt. 78-inik ilaasoqarsinnaavoq, saviminermik umiarsualiaavoq, Helsingørimilu 1949-imi sananeqarsimavoq. Atlantikoq 152-eriarlugu angalaarfiginikuuaa, ukiunilu sisamani sineriammi angallatitut atorneqarsimalluni piffissap 1949-miit 1968-p iluani"¹. Tunineqareernermi kingorna Logosimik taaguuteqartilluni 1988-mi Chilep sineriaani umiiarsimavoq².

Gæstebogi maanna Nunatta Allagaateqarfianiippoq, taannalu 1949-miit 1958-mut atorneqarsimalluni, kisiannili angalanerni tamani atorneqartarsimannginnera takuneqarsinnaavoq. Assersuutigalugu 1957-imi angalanerit ilaanniit umiarsuup aallarneraniit tikinneraniilu allattuisoqarsimanngilaq, angalanermilu eqqartorneqartumi umiarsuaq kivingajalluinnarsimavoq, tamannalu umiarsuup sulisuata inuuneranik akeqarsimalluni. Nalunaarasuartaatikkut attaveqatigiissimanermi takussutissat naapertorlugit atuarneqarsinnaavoq, umiarsuaq ulloq unnuarlu nalunaarasuartaatikkut attaveqarfigineqarsimanngimmat silaannakkoorummik ujarlerneq aallartinneqarsimasoq. Silali pitsannguumeriarmat antenneq sillimmataasimasoq ikkunneqarsimavoq, taamaasillunilu attaveqatigiinneq iluatseqqissimalluni. Pisumiit ukiut marloqqissaat qaangiummata M/S Hans Hedtoft imartami tassani silarlussimaneratalu assinganik silarlunnerani umiarsuaq kivivoq. Nalunaarasuaatinit assit digitalinngortitsinerminngaanneersut ilai uani quppernerup ataani takuneqarsinnaapput, maanna Nunatta Allagaateqarfiani Niuertut allagaataasa immikkoortortaqarfiani allagaatit inissisimapput.

Gæstebogi quppernerup naqqani takusinnaavat.

Najoqqutarisat

^{1. Schulz-Lorentzen, Helge: Et foreløbigt og ufuldstændigt forarbejde til en grønlandsk skibsregistrant. Tidsskriftet Grønland, 1998, nr. 3: 70-101.}

^{2. www.wrecksite.eu}