Nittartakkami allagaatit

Atuagarsuit (Kirkebøger)

Nunnatta Allagaateqarfiata allagaateqarneq pillugu inatsit malillugu atuagarsuit innuttaasunit takuneqarsinnaalerneranut killissarititaasoq ammaassigaangat nittartakkakut takuneqarsinnaalertarput. Tassa atuagarsuarni paasissutissat ukiunik 80-inik pisoqaassuseqaleraangata avammut saqqummiussinnaalersarmata.
Kalaallit Nunaanni nunarsuarmilumi tamani siuaasanik paasiniaaneq ilisimatusarnerlu aallunneqartaqaaq. Siuaasanik paasiniaasut atuagarsuit toqqammavissatut atornerpaasarpaat.
Atuagarsuit nunatsinneersut danmarkimi atugaasunut assingupput, atuagarsuilli nunatsinneersut ajoqersuiartornerup nunasiaataanerullu oqaluutuassartaa aamma ersersippaat. Atuagarsuit ilaatigut imaqarput oqaluffeqarnermi upperisarsiornermilu iliuutsinik makkuninnga:  kuisittut, apersortittut, katittut aamma ilisaasut. Atuagarsuarni nutaannginnerusuni takuneqarsinnaasarputtaaq inuit kuisimasuunngikkallaramik kalaallisut aqqi. Atuagarsuarni arlalinni aamma takuneqarsinnaasarput inuit kikkut oqaluffimmi nerliiviliarsimanersut taamatuttaarlu kikkut ilagiinniit aallarsimanersut kikkullu ilagiinnut nuussimanersut. Taamaattumik nunatta oqaluttuassartaanut inuisalu ataasiakkaat maani nunamiissimanerannik paasissutissatut Atuagarsuit pingaaruteqarluinnarput.

Atugarsuit takusinnaavatit uani.

M/S Umanak

Nittartakkatsinni aamma umiarsuup M/S Umanak-p ilaasunut allattuiffiutaa (gæstebog) alutornartoq 1949-miit 1958-imut allattuiffiusimasoq takusinnaavat. Inuppassuit M/S Umanak-mut ilaallutik Atlantikoq ikaarlugu angalanikuupput, immaqa illit aamma akornanniipputit. Umiarsuaq pillugu paasisaqarnerorusukkuit aammalu allattuiffik qupperarusukkukku una takuuk.

Jokum Knudsen

Nunatta Allagaateqarfiata allagaatit nittartakkakkut takutitassianngortitaat nutaat tassaapput Jokum Knudsenip 1950-ikkuninni assiutai Qaanaamiit Thulemeersullu. Una tooruk assillu qupperarlugit.

GTO-p assiutai

Nunatta Allagaateqarfiani GTO-p assiutai. Kalaallit Nunaanni 1950-ip kingorna sanaartorneq GTO-p ingerlatarivaa, tamaattumik ukiuni qulikkaani tulliuttuni GTO annertoorujussuarmik nunatsinni nutarterinermik teknikkikkullu ineriartortitsinermik sunniuteqarsimavoq.

Allagaatinik najoqqutassanik digitaliseeriineq

Nunatta Allagaateqarfiata allagaatinik najoqqutassiassanik assigiinngitsunik avammut takusassiassanik nittartakkakkut ataavartumik ikkussuisarpoq. Atuagarsuit kikkunnut tamanut nittarsaassinnaaleraangata ikkunneqartarput.
Nittartagaq nka.gl toorlugu imaluunniit Facebook aqqutigalugu malinnaaffigisinnaavatsigut.