Qilakitsormiut
Inuit upperisaat silarsuarmullu isiginnittaasiat pillugu katersugaasiviup kulturikkut kingornussatut tigussaanngitsutut katersugaannut tunngasunut paasisaqarit. Saqqummersitami paasisaqarfiginerusinnaavatit uaajeerneq tivanerlu suunersut, aammattaaq inuit oqaluttuatoqqanik oqaluttuartaaasiat paasissutissiissutigineqarpoq. Atisat paarilluakkat kusanaqisut takusarsinnaavatit, taakkualu Kitaata Avannaani Qilakitsormiut nunaqarfiata eqqaani ilivermi qaarusummiittumi timit paniinnarnikut arfineq-pingasut nassaarineqarmata ilanngullugit nassaajupput. Timit paniinnarnikut sisamat inimi immikkoortumiittut alakkarneqarsinnaapput, taakkualu ataatsimut qanga Nunatsinni inuunermik, toqumik, upperisamik inuiaqatigiinnillu oqaluttuarput.
Qilakitsormiut
1475-ip missaani Uummannap eqqaaniittup Qilakitsup eqqaani inuit iliverneqarsimapput. Ilivernilu marlunni nassaassaasimapput arnat arfinillit nukappiaqqallu marluk. Taakkua kinguaariit pingasuupput ilerrillu inuttai ilaqutariaassimapput. Suna toqqutaasimanersoq ilisimaneqanngilaq, kisiannili ilimagineqarpoq ukiukkut ineqarfiusartumut peqqammernerup nalaani toqusimassasut. Amernut nermussuunneqarsimapput atisaqarlutillu. Toqusut silarsuaannukarnissaminnut nassatassaanik piareersaassunneqarsimapput, taakkualu ileqqutoqqat malillugit suliarilluagaallutik. Amernik atisassaminnik arlaassaqarput, taamaasiornikkut toqusut silarsuaannukarnissaat ajornannginnerussammat ajunngitsumillu inuuneqassallutik. Arnat tallimat assigiingajannik kiinnamikkut kakiorneqarput, tassuunalu ilaqutariinnermut inuiaqatigiillu iluanni inuunerat qanoq inissisimanersoq takuneqarsinnaalluni. Arnani nukarlerpaaq 20-it missaannik ukioqarpoq kakiorneqaranilu: tamassuma takutippaa katissimanngitsuusoq meeraqaraniluunniit. Kakiuineq inuit arnartaanni ukiuni tusintilippassuarni ilisimaneqarluarluni atugaasimavoq. Nunatsinnili ajoqersuiartortut europameersut tikissimatsiarneranni ileqqoq atorunnaapallassimavoq, ajoqersuiartortummi kakiuineq kuisimannginnermut anersaarsiornermullu attuumassuteqartissimagunarmatigit ajortumillu isigineqarsimalluni. Atisaminni aamma aarnuaqarput. Inuillu aarnussat nukkassaatitut anersaanullu ajortunut illersuutissatut atortarsimavaat. Ilerrit qatanngutigiinnit Hansimit Jokum Grønvoldimiillu Uummannarmiunit nassaarineqarsimapput ukioq 1972-imi.