Aqarneq
Aqaat meeqqamut aaliangersimasumut pigititaavoq. Amerlanertigullu anaanaasup ataataasulluunniit meeqqaminut asanninnini takutinniarlugu meeqqani aqartarlugu. Kisiannili ilaquttat allat aamma meeqqamut aqaateqarsinnaapput. Aqaat meeqqamut nersorinninneruvoq aammalu immikkut piginnaaneqarsinnaalluni meeqqallu inua taamaasilluni nukkassarneqarsinnaalluni. Aqaat sinnassaataaneq ajorpoq. Aqaatilli aamma siunertarisinnaasarpaa meeqqap toqqissisimatilernissaa. Aqartariaatsit assigiinngitsuusinnaasarput. Aqartoqarsinnaasarpoq nipikitsumik. Erinnallu erinarsoruminartut atorneqartarlutik. Ullumikkut suli meeqqanut aqaasoqartarpoq.
Aqaatit ilaanneeriarlutit meeqqanut erinarsuutinngorsinnaasarput. Soorlu aana assersuutitut taaneqarsinnaasoq aqaat meeqqat erinarsuutaanninngaanneersoq:
”Aantuaraq Tobiarseeraq
Iisaavaraq Enooraq.
Inequnartoq quianartoq
angutinnguaq.
Alliartorit peroriartorit
angusinnaanngoruit
anaanat ikiorlugu.”
Najoqqutarisat:
Erinarsuutikka, Milik Publishing, 2012.
Hauser, Michael: The Inuit songs from the Thule area. 2010. Museum Tusculanum Press.
Thalbitzer, William: Texts from East Greenland. 1923. Bianco Luno, MoG.
Petersen & Hauser: Trommesangstraditionen i Grønland. 2006. Forlaget Atuagkat
