Nunatta Katersugaasivia Allagaateqarfialu
Grønlands Nationalmuseum & Arkiv

Nunatta Katersugaasivia Allagaateqarfialu - NKA - marlunnik immikkoortortaqarfeqarpoq: Katersugaasivik Allagaateqarfillu, taakkualu assigiinngitsumik suliaqarput

 

NKA's suliassarivai nalunaarsuinerit, katersinerit, aaqqissuussinerit, toqqorterinerit, ilisimatusarnerit siammarterinerillu

·         Kalaallit Nunaata kulturikkut kingornussaannik isumannaarinnissallutik

·         Kalaallit kulturiannik pinngortitallu oqaluttuassartaanik paasissutissiissallutik

·         Katersat kikkunnut tamanut ornigarneqarsinnaanngortillugit

·         Katersat ilisimatusarniartoqartillugu atorneqarsinnaasunngortillugit, taamaasiornikkullu ilisimasat annertusartillugit

·         Allagaatit oqaluttuarisaanermut allaffissornermut imaluunniit inatsiseqarnermut pingaarutillit uppernarsaatitut atorneqarsinnaajuaannarniassammata paarilluarneqartussanngorlugit

·         Kasileerisoqarsinnaasunngortillugu allagaatinut toqqorneqartariaqanngitsunut

·         Kikkut tamarmik allagaatinik alakkaasinnaanissaat qulakkeerniarlugu

 

Taakkua saniatigut NKA aamma kulturikkut kingornussanik, qangarnisanillu eriagisassanik eqqissisimasussanngortitsisarpoq, taakkualu saniatigut aamma illut piffiillu kulturikkut oqaluttuarisaanermut pingaarutillit eqqissisimasussanngortinneqarsinnaasarput.

Suliassat

Nalinginnaasumik Katersugaasiviup Kalaallit Nunaata kulturikkut kingornussaanik katersuineq, toqqortuineq, uppernarsaasiineq, ilisimatusarneq siammerterinerlu qulakkeertussaavaa. Aammattaarlu katersugaasiviuk illunik ataannartitsinissat eqqissisimasussanngortitsisarnerillu suliarisarpaa.

 

Allagaateqarfiup tunngaviusumik suliassarivai allagaatinik paarsineq, taassumalu aamma akisussaaffigaa katersineq, aaqqissuineq, paarsineq, nalunaarsuineq, ilisimatusarneq siammerterinerlu, taakkualu ataatsimut siunertarivaat Kalaallit Nunaanni inuiaqatigiinnermut kulturimullu ilisimasaqarnerulernissaq.

 

Katersugaasivik assaatitsisarpoq, misissuisarpoq ornigullunilu misissuieqataasarluni Kalaallit Nunaat tamaat kaajallallugu. Illuliortoqarnissamut aqqusinniornissamut mittarfiliornissamut il.il nunaminertamik atugassiisoqarniartillugu katersugaasivik isumasiorneqartarpoq taamaaliornikkummi qanganitsat eriagisassat sequtserneqassanngillat. Pisariaqarpallu assaatitsisoqartariaqarsinnaavoq.

 

Allagaateqarfiup nakkutigisarpai Namminersorlutik Oqartussat Kommuneqarfinnilu nalunaarsueriaaseq, taakkualua aamma nalunaarsueriaasiat akuerisussaallugu, pisortani suliffeqarfinnilu aamma nalunaarsueriaaseq nakkutigineqartarpoq. Sapinngisaq naapertorlugu illoqarfiit nalunaarsueriaasiat misissorneqartarpoq ukiut tallimakkaarlugit. Taamaaliortarnerullu siunertarivaa Kalaallit Nunaata oqaluttuassartaanut kulturianullu tunngasut annaaneqannginnissaat.

NKA.gl ujarfigiuk