Nunatta Katersugaasivia Allagaateqarfialu
Grønlands Nationalmuseum & Arkiv

Pikkorissarneq

Kalaallit illulioriaasiat kalaallit kulturikkut kingornussassaatat takussutissartarivaat

Nunatta Katersugaasivia aamma Center for Bygningsbevaring Rådvadimiittoq suleqatigiillutik Kalaallit Nunaanni illuutit eqqissisimatitat eriagisassallu tamakkuninnga immikkut suliallit amerlasuut aqqusaartagaasa suliarinnittarnerat tunngavigalugu sapaatip akunnera 40-mi ulluni pingasuni pikkorissartitsissapput.

Illuutit ukiuni kingusinnerusuni iluarsaanneqartarnerisigut misilittakkat ersersippaat atortut periaatsillu naleqquttut atornerisigut tamakku aserfallatsaalinissaat pisariitsuararsuusoq sapernanngitsorlu, akerlianilli atortut periaatsillu naleqqutinngitsut atortaraanni tamakku annertuumik aserfallapallartartut.

Illuutit pisoqaanerit aserfallatsaalinissaanni, iluarsaannissaanni, oqorsarluarnissaanni imaluunniit allanngortiternissaanni pitsaasumik angusaqarnissamut pingaaruteqarluinnarpoq atortut, sananeqaatit aamma assassornermi periaatsit sorliit atorneqassanersut ilisimassallugu, taakkumi illuummi pioreersumi atortut sananeqaatillu pisoqqat nutaallu suleqatigiissinneqartussaammata.

Ulluni pikkorissarfiusuni pineqassapput kulturikkut oqaluttuarisaaneq aamma qequmik, marraammik (mørtelimik), qarmasissianik, qisunnik qisuillu pitsaassusaannik, qalialersuutinik, igalaanik, matunik, iigalerinermi oqorsaasarnermilu suliaqartarneq Kalaallit Nunaanni illuutit pisoqaanerit eqqarsaatiginerullugit. Ullut pikkorissarfiusut ullup qeqqata siornatigut aallartinneqartassapput ileqquusumik atortut periaatsillu atuagarsuutitigut sammillugit tamannalu ullup qeqqasioreernermi ualillu sinnerani ingerlateqqinneqartassaaq assassortarissanik katersugaasiviup sullissiviani.  

 

Qaqugu
Marlunngorneq, oktobarip 3. – tallimanngorneq, oktobarip 5.

 

Akia
11.700 kr

 

Programmi nalunaarnerlu
Maani programmi takusinaavat, maanilu nalunaarsinaavutit

 

Nalunaarfissap killinga
Septembarip 15-iani.

NKA.gl ujarfigiuk