Nunatta Katersugaasivia Allagaateqarfialu
Grønlands Nationalmuseum & Arkiv

Eqqissisimasuutitaq imaluunniit tammatsaaliugaq?

Kalaallit illulioriaasiat kalaallit kulturikkut kingornussassaatat takussutissartarivaat. Nuna tamakkerlugu illoqarpoq eqqissisimasussaatitanik 158-inik, taassumalu saniatigut illut 350-it missaat tammatsaaliugassatut nalilerneqarnikuupput.

Illup eqqissisimasuutitap illullu tammatsaaliukkat assigiinngissusaat tassaavoq illup eqqissisimasussaatitap illulioriaaseq immikkuullarissoq kulturikkullu oqaluttuassartallip takutittaramiuk piffissaq nunap oqaluttuassartaanut pingaaruteqartorujussuaq, taamaasillunilu nunamut isumaqartoqujussuusarluni. Taamaattumik illup eqqissisimasussaatitap iluani silataaniluunniit aaqqissuussiniaraanni Nunatta Katersugaasivianut Allagaateqarfianullu akuersissummik qinnuteqaqqaartoqassaaq.

Illut tammatsaaliukkat aamma illulioriaatsimik kulturillu oqaluttuassartaannik takutitsisinnaapput, kisiannili taakku piffimmut aaliangersimasumut tunngasumik oqaluttuartarlutik. Eqqissisimasussaatitsineq illup ilaani tamaalluunniit, ilua silataaluunniit tammatsaaliugassatut nalilerneqarsinnaapput, imaassinnaavoq ilaanni silataannaa pineqaraluartoq, kisianni tamaat tammatsaaliugassatut isigineqassaaq. Taamaattumik Nunatta Katersugaasivia Allagaateqarfialu paasiniaaffigineqaqqaassaaq illup silataani allannguisoqarniartoqarpat.

Uani quppernermi paasisaqarneruffigisinnaavatit illut suut eqqissisimasussaatitaanersut, illuni eqqissisimasussanngortitsisarnerup tammatsaaliuisarnerullu oqaluttuassartaa, illut tammatsaaliukkat Kalaallit Nunaannilu eqqissisimasussanngortitsisoqarnissaanik pilersaarutit.

NKA.gl ujarfigiuk